ݙھاکہ۔8دسمبر(اے پی پی)دھاکہ دے شیر بنگلہ کرکٹ سٹیڈیم اچ آف سپنر ساجد خان دیاں پھیرویاں بالاں پاروں پاکستان بنگلہ دیش کوں ݙوڄھے ٹیسٹ میچ اچ پنجویں اتے چھیکڑی ݙینھ ہک اننگز اتے 8 رنز توں ہرا تے ݙو ٹیسٹ میچاں دی سیریز وائٹ واش کر ݙتی۔ پاکستان اپݨی پہلے اننگ 300 رنز 4 کھیݙاڑی آئوٹ تے ڈکلیئر کر ݙتی ہئی۔ ولدے اچ میزبان ٹیم ساجد خاں دی تباہ کن بالنگ اتے 8 وکٹاں پاروں پہلی اننگز اچ صرف 87 رنز تے مک ستی اتے فالو آن تھی ڳئی۔ ݙوڄھی اننگ اچ وی بنگالی ٹیم نہ سنبھل سڳی اتے صرف 8 رنز پہلے ہمت سٹ ڳئی اتے پاکستان میچ ہی نئیں سیریز وی ݙو صفر توں جیت ڳھدی۔ ساجد خان پہلی اننگ اچ 8 اتے ݙوجھی اننگ اچ 4 وکٹاں اتے مجموعی طور تے میچ اچ 12 وکٹاں ڳھن تے مین آف دی میچ رہین۔ بنگلہ دیشی ٹیم ݙوڄھی اننگ اچ 27 رنز تے 4 وکٹاں ݙے ٻیٹھی۔ اوپنرز شادمان اسلام 2 اتے محمود الحسن 6، نجم الحسن 6 اتے مومن الحق 7 رنز ٻݨا سڳین۔ لٹن داس 45 اتے مشفق الرحیم 48 سکور ٻݨا تے ٹیم کوں آن سنٻھالیے اتے انہاں توں بعد شکیب الحسن وکٹ تے ݙٹیے رہین جیکوں 63 رنز تے ساجد خان پویلئن ٻھیڄے۔ مہدی حسن 14 رنز ٻݨا سڳین۔
